Viti noqu Viti

Na timi ni rakavi ni Viti e sega ni dua na timi e dodonu me wili e matana.

Ia, ena rawa ga oqori ke dei na yaloda ni da rawata na i naki e lomada.

E sega ni dua ena rawata vei keda.

E sega ni veivuke mai Peritania, Niusiladi se Ositerelia se dua tale na matanitu.

O Viti ga ena rawata na nona sasaga.

Au sega ni tarova rawa na vakananuma na mataqali qito era vakaraitaka o ira na tamada kei ira na tukada ni rau sota tiko o Viti kei Ositerelia ena bogi ni Vakarauwai.

O ira noda qase e sega ni vakamelei nodra veipasi, nodra ciqoma vinaka na polo kei na nodra dei ena nodra veitokonitaka nodra sasaga.

Ciqomi na polo ena dei ni yalo kei na cici vakadodonu, na ceba e sega ni raica rawa na matana o koya e sega ni kila na gone ni Viti e vakau polo tiko.

Bera na sauriva sa soli e dua na pasi vakababa; ciqo vinaka o koya e cici mai ena yasana ka dua; ka sega ni dua e tarai koya ena nona sa laki tabaka na polo.

Na veivesu li e rerevaki ena nodra vesu vakavinaka na matai ni meca e kosova na matana e dua na lewe ni timi ni Viti.

E vesu vata na tamata e vakau polo kei na polo ka vakadavori e ra.

Ni sota noda timi nikua kei na dua na timi jabeni me vakataki Niusiladi se o Ositerelia; e ra dau vakatoka me rau sota e dua na Tevita kei Koliaci o ira na dau volaitukutuku kei ira na daukacikacivaki ena retio se retio yaloyalo.

O Viti nikua e sa tu ena boto ni tuitui kevaka e vakatautauvatani kei na noda timi ena 30-50 na yabaki sa oti ka wili me vaka e dua na gone vakataki Tevita.

Ia, kevaka me da dikeva mada vakamakare na bula nei Tevita e da na rawa ni vuli mai kina.

O Tevita e dua na gone lailai sara ena gauna e a bolei Koliaci kina.

E kainaki ena volai tukutuku i Isireli ni se qai yabaki 16 se 17 ena nodrau vala mai na buca o Ela.

E na nona sikovi iratou na tuakana e tolu ena buca ni valu o Tevita e a rogoca nona bolebole tiko o Koliaci.

Qo na gauna ena veiyabaki nodrau dau mai vakasa kaukauwa o Isireli kei Filisitia.

Rogo tiko o Tevita ni sa bolei kece na kai Isireli me dua e lako yani me rau vala kei koya e bolebole tiko; o Koliaci.

Na tui o Saula; o ira nona turaga ni valu kei ira na i to nei Isireli era sa rere.

Sa mai galu tu yani o Isireli ena loma ni 40 na siga e bolebole tiko kina na kai Filisitia oqo.

E sega ni dua e via bolea na kai Filisitia oqo baleta ni sa rui tamata levu.

E tuwawa; sivia na ciwa na fiti na kena balavu; ka vakaisulu ni valu parasa; nona moto e sega ni ka wale; ka dua e liu vua me colata tiko nona i sasabai.

Na domona e ka rerevaki ka voqa ena veidelana ena veimataka kei na veiyakavi ena gauna e bolei ira tiko kina na kai Isireli.

Ia, o Tevita ena nona rogoca na bolebole oqo e sa sega ni tarova rawa nona cudru e lomana ena kena sa vakacacani na mataivalu nei Isireli.

Vakabibi ni vakacacani tiko nodra Kalou bula e ra matataka na Isireli.

Ni sa rogoca o koya na i cocovi ena solia na tui vei koya e vakadrukai Koliaci; e a taroga tale ena matana levu;

“A cava na ka ena caka vua na tamata sa na mokuta na kai Filisitia oqo . . .”

O Tevita e sega ni raica na levu ni kai Filisitia; ia, e raica na nona sa mai vakarogorogocataki nona Kalou.

E ca vua ni sa mai vakacacani na Kalou bula ka sa laveti cake na kalou matakauceuceu ni kai Filisitia ena nona sa mai bolebole o Koliaci.

Ni sa rogoca o Iliapi na tuakana ulumatua a sa vosataki Tevita ka kaya ni tamata viavialevu; yalo ca; ka lako ga mai me via mai sarava na i valu.

E ca vei Iliapi baleta ni rere tiko me vakataki ira na vo ni kai Isireli ka mai vosa doudou tiko na tacina lailai; gone duadua.

Ia, eda kila kece na i talanoa ni rau sa lade yani ena loma ni buca me rau vala; e sega ni wawa tale o Tevita.

E dei na yalona nona kila vinaka na vakayagataka nona i yaragi; e lima na vatu mulo vinaka ka tomika mai bati ni wai kei na nona i rabo.

O Tevita e a sa yavita oti na laione kei na pera; ka kila deivaki e yalona ni liga laulau vinaka; e na sega ni cala nona i rabo.

Ni sa raici koya na kai Filisitia; e sa beci koya ni se cauravou lailai, damudamu ka mata vinaka.

O Tevita ena nona sa kaciva me bolea na kai Filisitia; e sa bolea ka kaya ni sa sega ni yaco na veivakabulai ena i selewau se na moto; ni sa lewa na i valu o Jiova.

Cici yani o Tevita, taura mai e dua na vatu ka rabotaka; lauta na yadrena na kai Filisitia; coba e yadrena, ka bale vakatobuicu o Koliaci.

Cici yani o Tevita, taura nona i selewau na kai Filisitia ka tamusuka laivi kina na uluna.

E davo na tuwawa; qaqa na cauravou lailai o Tevita.

E sa gauna tale oqo me ra vakaraitaka nodra kaukauwa na veimatanitu lelevu nodra kaukauwa ena sotasota ni vuravura ena rakavi e Varanise ena vula o Sepiteba kei na Okotova.

Sa oti nodra gauna o ira noda qase; sa nodatou gauna na bula tiko nikua.

Na timi ni Viti e a yacova ga na kotafainala ena matai ni sotasota ena 1987 ka sebera tale ni yacova na i vakatagedegede oya.

Ena rawa ni yacova na i vakatagedegede sara e cake kevaka e da yalo vata ka da tokoni ira noda cauravou ena masu kei na noda sakitaka ni na rawa na i naki.

Sega ena noda kaukauwa vakataki keda; se na moto kei na i selewau ni kaukauwa vakatamata.

Ia, ena kaukauwa ni noda Turaga, o Jiova; ena rawa meda vakadrukai ira kece na veimatanitu kaukauwa.

Era raica nodra yaragi vakailavo kei na i yau vakavuravura ka ra na vakaraitaka ena loma ni rara ni qito mai Varanise.

Sa gauna oqo me da vakarautaki vinaka noda lima na vatu mulo; ka da vakavinakataka noda i rabo kei na kena vakayagataki vinaka me davo kece na meca.

Davo na laione kei na pera; ka davo talega o Koliaci.

Toso mai Viti; ena rawa na i naki kevaka eda torova yani noda Kalou.

E sega ni veivakabulai na i selewau se na moto; ni sa lewa na i valu o Jiova.

1 Comment

Filed under Rakavi, vakaViti

One response to “Viti noqu Viti

  1. Sitiveni Matai

    Au kila ni dua na vu ni leqa ni sa sivia na nodra kana madrai kei na raisi ena gauna oqo qai qai vata na kena kakana mamada teri yaga.

    Sa lailai na kana ba via se vavai.

    Ke me dua na dau ni vakasala ni kakana me qarava na noda toa ni vala, me ra gunu rourou ga, so ga na siga qai ra vakidacalataki e na ika.

    Vinaka na veivakayaloqaqataki tiko.

    E da kila vinaka nai bole ni bera na la’i vala me da tarogi ‘RAWA SE SEGA?’

    Ia au kila ni so, ena gauna oqo, sa ra vakayacora ga na nodra sauma mai ena “RAWA!”

    Qai ra tadu yani i rara sa tiko tale na basi ni Taveuni ya.

    Sa malumu mai na yalo ni vala.

    Sa sivia na noda vaqoroya tiko na ka da raica tiko ena Super 14 se 6 Nations mai Iurope.

    Qai da la’i sota vatakei ira sa vaka me da namaka tu ga na druka.

    Me ra qai dau kaya mai e so ”

    “..sa vinaka madaga ni sa ra na bau vulica kina e so na mesamesa ni qito…”

    Ia ena yaco i vei na vuli da cakava tiko?

    Da vakavulici tikoga me yacova na cavuka ni cegu. Vosota sa sivia tale beka…….

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s