Lave na rara mai Varanise

veitayaki-wales.jpg

Vakasamataka mada vakamalua . . . 

E sa mai davo na qaqa . . . na timi ni Niusiladi ena fainala ni sotasota ni vuravura . . . io vei Viti; vei ira noda cauravou; na timi ni rakavi ni Viti.

 

E dalaga o Varanise kei vuravura ni sa mai cuva sobu na vei timi e 19 ena nodra sotasota ni valataki vanua ka sa lave na rara mai Varanise; ka ratou laveta na noda cauravou na bilo koula na William Webb-Ellis.

 

Eratou veitagicaki; dredre ena marau; ka ratou daramaka tiko nodratou siqeleti vulavula kei na taurasese loaloa; ka ratou veimokomoko ena marau ni nodratou qaqa . . .

 

Veicurumaki na reki ni qaqa kei na luluvu nodratou sega vakadua ni vakabaubata na ka e sa mai yaco; eratou sa cici wavoki ena loma ni rara; era kaikaila ka ra vakasausau na sarasara.

 

E ra dalaga ka kurea na uludra ena qoroqoro ena druka nei Niusiladi ena kai e 20-15 ena loma ni rara vakaiyanaqa oqo..

 

Era sokanu nodra i dabedabe na sivia na 80,000 era dabe tiko ena loma ni rara na Stade de France e St Denis ena taudaku kei Parisi; sega vakadua ni ra vakabauta me winitaka na bilo ni jabeni ni vuravura na yanuyanu midimidi o Viti.

 

E datou tadra tiko beka qo? Eratou vakataroga na cauravou ena nodratou liaca tiko na veika e sa mai yaco.

 

Sega. Sa ka dina saraga oqo; sa nodatou na qaqa.

 

E ka tu beka ga ni tadra na veika e yaco e koto e cake oqo, ia; au vakabauta ni oqo e noda tatadra tu beka ga na lewei Viti nikua ena noda vakavakarau tiko ena sotasota ni vuravura ena vula o Sepiteba kei na Okotova.

 

E levu beka e kaya ni rawa beka ga na bilo ena qito leyavitu; ka sa bau vaya ena qito dina; na leyatinikalima.

 

E levu e sa sega ni via kauwaitaka na sotasota oqo ena nodra raica na i tuvaki ni timi ni Viti oqo kei na kena dredre nodratou mai keba vata se qito vata tiko ena vakavakarau me vakataki ira na timi lelevu tale eso.

 

E lewe levu e sa vakataudeitaka nodra vakabauta ni sa noda qito ga na rakavi leyavitu ka sa sega ni dua na kena yaga na rakavi leyatinikalima.

 

Ia, kevaka eda raica vakamalua ni rawa ni da rawata na bilo oqo ena yabaki oqo ena i ka 20 ni Okotova (mataka ni Siga Tabu, 21 ni Okotova e Viti) ena fainala mai Varanise.

 

Eda sa vakadinadinataka oti ena leyavitu ni rawa ni da vakadruka ga e dua na timi e vuravura.

 

Ia, ena tekivu me na veisautaki noda raica na bibi ni qito dina kei na i vakatakarakara ni qito ena leyavitu.

 

Na qito leyavitu eda taleitaka baleta ni levu na noda galala kei na vanua meda vakaciciva kina na polo.

 

Ia, na qito dina me na rawa mada vakavinaka na polo ena sikaramu kei na laini ni tuba me na qai rawa ni da vakaciciva na polo.

 

E sega na betena na noda vakamacalataka noda rawa ni da qaqa ke sega ni wali vinaka na leqa oqo.

 E sa tekivu laurai tale tiko na leqa oqo ena sotasota ni Pacifix Nations Cup ena sota kei Samoa ka vakakina o Junior All Blacks ena macawa sa oti. 

E a kune levu na leqa ni malumalumu oqo e na noda timi ni vanua ena loma ni veiyabaki ni cava na 80 kei na i tekivu ni 90 ka mai kune vakamatata na kena wali nona mai veitauri ena timi ni Viti o Brad Johnstone ena 1994.

 

Oti ga e vica na vula nona veitauri o Johnstone e a davo o Samoa mai Prince Charles Park e Nadi ka sega ni rawata o Viti ni rauta e tolu vakadua na yabaki ni oti na sotasota ni vuravura ni 1991.

 

Au vakabauta ni ka talei kevaka e dua na gone i taukei e veitauri ena timi ni Viti; ia, kevaka e sega ni wali rawa na leqa lelevu oqo e sega vakadua ni rawa na i naki ni noda qaqa ena qito rakavi dina.

 

Ia, au qai kerea nomuni vakaraitaka mai nomuni rai ena vakasama oqo ena kena vanua sa vakarautaki e ra.

 

Ia, au na via vakacavara na i kau ni vakayatuyatu oqo noda lesu tale ki Varanise.

 

E tiko o Viti e na tobu B ka ratou tiko kina na timi ni Ositerelia, Welesi, Japani kei Kenata.

 

O Viti ena sota kei Japani ena matai ni nona qito ena rara mai Tolouse ena ceva kei Varanise ena ono ena yakavi ni siga Vukelulu ka 12 ni Sepiteba (ono ena mataka ni Lotulevu ka 13 ni Sepiteba e Viti).

 

Me qarauna o Viti na i karua ni qito ena rua ena yakavi ena Siga Tabu i ka 16 ni Sepiteba mai Cardiff e Welesi (rua ena mataka ni Monite e Viti) baleta ni yawa o Welesi kevaka e vuka ena waqavuka se vodo ena basi ena dua na i lakolako balavu.

 

Ena loma ga ni va na siga ena lako vakabalavu ki Welesi ka dodonu me biubiu vakatotolo ni oti na qito kei Japani e Tolouse me rawa ni vakarau vinaka kina; ke sega ena dua na i rogo mai Welesi.

 

Ena cegu macawa dua o Viti sebera ni sota kaukauwa duadua kei Ositerelia e Montpellier ena veimama na rua ena yakavi ena Siga Tabu na i ka 23 ni Sepiteba (veimama na rua ena mataka ni Monite, 24 ni Sepiteba e Viti).

 

E yawa cake ena natuicake kei Tolouse o Montpellier ka me na vakatotolo kina koro ni sotasota na timi ni Viti me vakarau vinaka kina.

 

E dua tale na macawa nona cegu o Viti ni bera ni rau sota kei Welesi ena lima ena yakavi ni siga Vakarauwai i ka 29 ni Sepiteba (lima ena mataka ni Siga Tabu; 30 ni Sepiteba e Viti e Marseilles.

 

Na sota kei Welesi e i otioti ni qito ni tobu nei Viti.

 

Kevaka e druka o Japani, Kenata kei Welesi ka druka vei Ositerelia e na lade cake kina kotafainala ka na sota kei Igiladi ena i katolu ni kotafainala ka na vakayacori ena tolu ena yakavi ni Siga Tabu na i ka vitu ni Okotova (tolu ena mataka ni siga Monite e Viti) e Marseilles e natuicake kei Parisi.

 

Kevaka e davo o Igiladi ena kotafainala e rau na sota o Viti kei Varanise ena semifainala ka na vakayacori ena ciwa ena bogi ena Siga Tabu ena i ka 14 ni Okotova (ciwa ena mataka ena siga Monite, 15 ni Okotova) ena Stade de France e St Denis.

 

Kevaka e rau fainala kei Niusiladi e rau na sota ena rara vataga ni semifainala ena Stade de France ena ciwa ena bogi ni siga Vakarauwai (ciwa ena mataka ena mataka ni Siga Tabu, 21 ni Okotova).

 

E sa i tuvatuva vakatamata me ra cibitaka na veimatanitu vakailavo nodra timi ni qito me ra rogo ka ra caka nodra kina ena sotasota ni vuravura kevaka e rakavi, veicaqe se dua tale na qito.

 

Ia, noda Vanua o Viti e na rawata na bilo ni qaqa kevaka e cibitaka nona Turaga o Jisu me kauti ira noda cauravou me ra davo na tuwawa ni qito ena veiyasai vuravura.

 

E vakatau vei keda; kevaka eda raica noda malumalumu; ciqoma ka walia; ka ravi vua na Kalou ni ravuravu ka Nona o lomalagi kei vuravura; ena rawa na ka eda gadreva ka me da kua ni ravi ena veika era ravi tu kina na veimatanitu vakailavo ena qaqa vakayago kei na i yau vakavuravura.

 

i Taba: Au na viriviri kemu bai . . . Jo Veitayaki ena cibi mai Welesi. BBC

Leave a comment

Filed under Rakavi

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s